Göygöl rayonunda Novruz Bayramı münasibətilə ümumrayon şənliyi keçirildi

Göygöl rayonunda  Azərbaycan xalqının milli bayramı – Novruz Bayramı münasibətilə ümumrayon  şənliyi keçirildi.  Şənlik  Şəhər mərkəzi stadionunda təşkil edilmişdir. İcra hakimiyyəti tərəfindən təşkil edilmiş  şənlikdə Göygöl Rayon İcra Hakimiyyətinin Başçısı cənab Arif Seyidov, Milli Məclisin Deputatı cənab Rövşən Rzayev, rayonda fəaliyyət göstərən idarə və müəssisələrin kollektivləri, ictimaiyyət nümayəndələri, Qarabağ müharibəsi əlilləri, şəhid və  aztəminatlı ailələr, idmançılar, musiqiçilər və kütləvi informasiya vasitələrinin nümayəndələri iştirak etdilər.
Rayon İcra Hakimiyyətinin Başçısı cənab Arif Seyidov və Milli Məclisin Deputatı cənab Rövşən Rzayev çıxış edərək Azərbaycan xalqının uzaq qədimlərdən bu günədək sevə-sevə qeyd etdiyi  Novruz Bayramı münasibəti ilə tədbir iştirakçılarını təbrik etdilər və bahar bayramının xalqımıza ruzi-bərəkət gətirməsini arzuladılar.
Cənab Arif Seyidov bayramın rəmzi  olan “Novruz tonqalını” alovlandırdıqdan sonra, qonaqlarla birgə hər bir kollektivə yaxınlaşaraq bayram münasibəti ilə təşkil olunmuş süfrələrlə tanış oldular və onlara bir daha öz xoş arzularını çatdırdılar. Eyni zamanda rayon idmançılarının nümunəvi çıxışlarına da tamaşa olundu.
Novruz Bayramının əsas personaları olan Kosa, Keçəl və Bahar Qızı atlıların müşayiəti ilə faytonda şəhərin küçələrini dövr edərək meydançaya daxil oldular və öz duzlu və məzəli çıxışları ilə şənliyə rəngarənglik qatdılar. Dəvət olunmuş kəndirbazlar isə xüsusi əyləncəli proqramları ilə çıxış etdilər.
Şənlik rayon Mədəniyyət Mərkəzinin təşkil etdiyi rəngarəng konsert proqramı ilə davam etdirildi.