Vətən müharibəsi şəhidi Eldarzadə Azər İsmixan oğlunun ikinci ildönümü məzarı başında qeyd edilib və ailəsi ziyarət olunub
03 dekabr 2022 | 17:17
03 dakabr 2022-ci il tarixdə Göygöl Rayon İcra Hakimiyyətinin başçısı Elvin Paşayev, YAP Göygöl rayon təşkilatının sədri Vüqar İsayev, rayonun hüququ mühafizə orqanlarının və İcra Hakimiyyətinin məsul şəxsləri, şəhidin ailə üzvləri, qazilər və ictimaiyyət nümayəndələri tərəfindən 44 günlük Vətən Müharibəsində torpaqlarımızın azadlığı və ərazi bütövlüyü uğrunda aparılan döyüşlərdə şəhidlik zirvəsinə ucalmış Eldarzadə Azər İsmixan oğlunun ikinci ildönümündə Göygöl şəhər Şəhidlər xiyabanında məzarı ziyarət olunaraq üzərinə gül dəstələri düzülüb, ruhuna dualar oxunub və əziz xatirəsi ehtiramla anılıb. Sonra şəhidin ailəsi evində ziyarət edilib.
Xatırladırıq ki, şəhid Eldarzadə Azər İsmixan oğlu 25 oktyabr 1994-cü ildə Göygöl şəhərində anadan olmuşdur. 2000-ci ildə Göygöl şəhər İ.Novruzov adına 4 nömrəli tam orta məktəbin 1-ci sinfinə qəbul edilmişdir. 2011-ci ildə həmin məktəbin 11-ci sinfini bitirmişdir.
2012-ci ildən 2014-cü ilədək “N” saylı hərbi hissədə həqiqi hərbi xidmət keçmişdir. 2014-cü ildə “N” saylı hərbi hissədə müddətdən artıq xidmət edən hərbi qulluqçu kimi xidmətə başlamışdır. 2016-cı ildə “Dördgünlük müharibə” adı ilə tarixə düşən Aprel döyüşlərində və 2020-ci ilin iyul ayında baş verən Tovuz döyüşlərində iştirak etmişdir.
27 sentyabr 2020-ci ildə 44 günlük Vətən müharibəsi başlayan zaman hərbi döyüşlərdə iştirak etmişdir. Azər Eldarzadə 30 sentyabr 2020-ci il tarixdə Kəlbəcər rayonu istiqamətində gedən döyüşlərdə şəhid olmuşdur. 3 dekabr 2020-ci il tarixdə Göygöl Şəhidlər Xiyabanında dəfn edilmişdir. Ölkə Prezidentinin müvafiq Sərəncamlarına əsasən ölümündən sonra “Vətən uğrunda”, “İgidliyə görə” və “Kəlbəcərin azad olunmasına görə” medalları ilə təltif edilib. Evli idi, 1 övladı var.
Keçidlər
