“Şahin” hərbi-idman oyununun rayon birinciliyi keçirilib
17 aprel 2023 | 14:33
“Şahin” hərbi-idman oyunu gənclərin vətənpərvərlik, milli qürur və milli ləyaqət ruhunda tərbiyə edilməsi, onların mənəvi-psixoloji və hərbi-fiziki hazırlığının təmin olunması məqsədilə respublikada fəaliyyət göstərən ümumtəhsil müəssisələrinin VIII-X siniflərində təhsil alan şagirdlərin iştirakı ilə artıq 1996-cı ildən etibarən keçirilir.
“Şahin” hərbi-idman oyunu Gənclər və İdman Nazirliyi, Elm və Təhsil Nazirliyi, Müdafiə Nazirliyi, Fövqəladə Hallar Nazirliyi, Səfərbərlik və Hərbi Xidmətə Çağırış üzrə Dövlət Xidmətinin birgə qərarına əsasən keçirilən kütləvi hərbi-idman oyunudur.
“Şahin” hərbi-idman oyunu üzrə Göygöl rayon birinciliyi 15 aprel 2023-cü il tarixdə şəhər ərazisində yerləşən “N” saylı hərbi hissə ərazisində keçirilib. Birincilikdə iştirak etmək üçün rayonun 23 ümumtəhsil məktəbi onlayn qeydiyyatdan keçmiş və birincilikdə 23 komanda olmaqla 322 şagird iştirak etmişdir.
Rayon birinciliyində 1-ci yeri Göygöl şəhər İ.Hüseynov adına 1 nömrəli tam orta məktəbin komandası, 2-ci yeri Üçtəpə kənd tam orta məktəbin komandası, 3-cü yeri Göygöl şəhər 6 nömrəli tam orta məktəbin komandası, həvəsləndirici 4-cü və 5-ci yerləri isə Topalhəsənli kənd və Xəqani kənd tam orta məktəbin komandası qazanmışdır.
“Şahin” hərbi-idman oyunu üzrə rayon birinciliyində birinci yeri qazanmış Göygöl şəhər İ.Hüseynov adına 1 nömrəli tam orta məktəbin komandası 27 aprel 2023-cü il tarixdə Goranboy rayonunda keçiriləcək zona birinciliyində iştirak edəcəkdir.
Keçidlər
