Sabahın xeyir, #Göygöl!
07 avqust 2023 | 10:30
İlhamiyyə Abbasova 1957-ci ildə Göygöl (Xanlar) rayonunda anadan olub. 1964-1974-cü illərdə Göygöl şəhər 3 saylı tam orta məktəbdə orta təhsil almışdır. 1975-ci ildə H.Zərdabi adına Kirovabad Dövlət Pedaqoji İnstitutunun fizika-riyaziyyat fakültəsinə qəbul olmuş, 1979-cu ildə həmin institutu bitirmişdir. 1981-ci ildən Göygöl şəhər 3 saylı tam orta məktəbdə riyaziyyat müəllimi işləyir. Azərbaycan Respublikası Prezidentinin müvafiq Sərəncamı ilə “Əməkdar müəllim” fəxri adına layiq görülmüş, Təhsil Nazirinin müvafiq əmri ilə “Qabaqcıl təhsil işçisi” döş nişanı, “Fəxri Fərman” və “Təşəkkürnamələr”lə təltif edilmişdir. YAP-nın üzvüdür. Ailəlidir, üç övladı var.
İlhamiyyə Abbasova hər zaman peşəkarlığı ilə seçilir, daim pedaqoji məharətini daha da təkmilləşdirmək yollarını axtarır, pedaqoji innovasiyaları öyrənir, şagirdlərinə dərin və əhatəli bilik verməyə çalışır. Yüksək insani keyfiyyətləri ilə seçilən İlhamiyyə Abbasova həm bütün müəllim kollektivinin, həm də şagird və valideynlərin hörmətini qazanıb. Müəllim əməyinin nə qədər əziyyətli olduğunu bildiyimizdən, İlhamə müəllim kimi öz işinin vurğunu olan pedaqoqlarla rastlaşanda çox sevinirik. O, dərs dediyi sinifdə müəllim-şagird əməkdaşlığı hər zaman səmərəli şəkildə qurulur. Bununla yanaşı, şagirdlərin hər birinin fərdi xüsusiyyətlərini, qavrama qabiliyyətlərini, təfəkkürlərinin inkişaf səviyyəsini, sinif kollektivində və ailədəki yerini, mövqeyini müəyyənləşdirir, onlara ana qayğısı ilə yanaşır, yüksək mənəvi keyfiyyətlər aşılayır. Müəllim biliklərin qazanılması yolunda bələdçilik edir.
Dərs dediyi şagirdlərdən Abbasova Günay, Aslanlı Nəzrin, İbrahimov Cəmil, Əsgərov Vüqar, İsmayılov Samir, Əliyev Elvin və onlarla məzunlar yüksək bal toplayaraq müxtəlif ixtisaslar üzrə ali təhsil müəssisələrində təhsil almışlar. Bu şərəfli və məsuliyyətli işində biz də İlhamiyyə Abbasovaya can salığı, işində müvəffəqiyyətlər diləyirik.
Keçidlər
