Sabahın xeyir, #Göygöl!
05 avqust 2024 | 09:29
Şəhid kapitan Cəbrayılov Elnur Tofiq oğlu 26 aprel 1981-ci ildə Göygöl rayonunun Çaylı kəndində anadan olmuşdur. 1988-ci ildə Gəncə şəhər Ə.Cavad adına 2 nömrəli tam orta məktəbin 1-ci sinfinə qəbul edilmişdir. 1994-cü ildə Göygöl şəhərinə köçərək orta təhsilini Göygöl şəhər 6 nömrəli tam orta məktəbdə davam etdirmişdir. 1999-cu il tarixdə həmin məktəbin 11-ci sinfini bitirmişdir. 1999-2003-cü illərdə Gəncə Dövlət Universitetində ali təhsil almışdır.
2003-cü ildən 2004-cü ilə kimi “N” saylı hərbi hissədə həqiqi hərbi xidmət keçmişdir. 2004-cü ilin aprel ayında zabit olmaq üçün Azərbaycan Silahlı Qüvvələrinin Təlim Tədris Mərkəzində oxuyaraq leytenant rütbəsi almışdır. 2004-cü ildən Göygöl şəhər İ.Hüseynov adına 1 nömrəli tam orta məktəbində və Göygöl rayon İ.Mahmudov adına Çaylı kənd tam orta məktəbində tarix müəllimi işləmişdir. 2013-cü ildə müəllimlik vəzifəsindən könüllü ərizəsi ilə işdən çıxmışdır. Həmin ildə “N” saylı hərbi hissədə leytenant kimi ordu sıralarına qatılmışdır.
27 sentyabr 2020-ci ildə 44 günlük Vətən müharibəsi başlayan zaman hərbi döyüşlərdə iştirak etmişdir. Elnur Cəbrayılov 13 oktyabr 2020-ci il tarixdə Füzuli rayonu istiqamətində gedən döyüşlərdə şəhid olmuşdur. 16 yanvar 2021-ci il tarixdə Göygöl Şəhidlər Xiyabanında dəfn edilmişdir. Ölkə Prezidentinin müvafiq Sərəncamlarına əsasən ölümündən sonra “Vətən uğrunda”, “Xocavəndin azad olunmasına görə”, “Füzulinin azad olunmasına görə” medalları və 3-cü dərəcəli “Rəşadət ordeni“ ilə təltif edilib. Evli idi, 2 övladı var.
Keçidlər
