Göygöl şəhər 1 nömrəli tam orta məktəb
27 fevral 2023 | 10:16
830 şagird yerlik şəhid İbrahim Hüseynov adına Göygöl şəhər 1 nömrəli tam orta məktəb 2007-ci ildə inşa edilib, 3 mərtəbədən və 44 sinif otağından ibarətdir. Məktəbdə hal-hazırda 777 şagird təhsil alır, onların təlim-tərbiyəsi ilə 100 nəfər pedaqoji işçi məşğul olur. Bunlardan Azərbaycan dili və ədəbiyyat müəllimi Qazıyeva Dilarə Halay qızı əməkdar müəllim, biologiya müəllimi Mehdiyeva İrina Səməd qızı isə elmlər namizədidir.
Məktəbdə 2 kompüter laboratoriyası və 3 fənn laboratoriyası fəaliyyət göstərir. Kimya, biologiya, fizika, informatika dərsləri laboratoriya kabinetlərində tədris edilir. Şagirdlərin vətənpərvər ruhda tərbiyə olunmasına xidmət edən Gənclərin çağırışaqədərki hazırlığı kabineti lazımi avadanlıq və əyani vəsaitlərlə tam təmin olunmuşdur. Məktəb komandası “Şahinlər” hərbi-vətənpərvər yarışında iştirak edərək rayon və zona mərhələsində qalib olaraq respublika mərhələsində vəsiqə qazanmış və IV yerə layiq görülmüşdür.
Məktəbdə 2 peşə təmayüllü sinif fəaliyyət göstərir: 10p sinfində dərzi və dülgər ixtisası üzrə, 11p sinfində isə aşpaz, kombi, kondisoner ixtisasları üzrə təhsil alırlar.
Bir nəfər 11-ci sinif şagirdi İsmayılova Nailə Həbib qızı 17 dekabr 2022-ci il tarixində keçirilən fənn olimpiadasının rayon mərhələsində kimya fənindən qalib olaraq növbəti finala uğur qazanmışdır. 2021/2022-ci tədris ilində 76 şagird tam orta təhsil haqqında attestat alıb, onlardan 44 şagird ali məktəbə iş vermiş və 23 nəfəri ali məktəblərə qəbul olmuşdur. 6 şagird 500-dən yuxarı, 1 şagird isə 600-dən yuxarı bal toplamışdır.
Məktəbdə mütəmadi olaraq bilik müsabiqələri, çoxnövçülük üzrə idman yarışları və tarixi günlərə həsr olunmuş tədbirlər keçirilir. İstedadlı şagirdlərin üzə çıxarılmasına xidmət edən müxtəlif müsabiqələr təşkil olunur. Eyni zamanda şagirdlər rayonda keçirilən tədbirlərdə məktəbi layiqincə təmsil edirlər.
Məktəb kollektivinə və şagirdlərə uğurlar arzulayırıq.
Keçidlər
