Göygöl rayonunda Heydər Əliyev ili çərçivəsində silsilə tədbirlər davam edir

Göygöl rayonunda Heydər Əliyev ili ilə bağlı hazırlanmış tədbirlər planına uyğun olaraq “Azərbaycan təhsilinin inkişafında Heydər Əliyevin rolu” mövzusunda dəyirmi masa keçirilib. Tədbirdə YAP Göygöl rayon təşkilatının sədri Vüqar İsayev, Göygöl Rayon İcra Hakimiyyəti başçısının İctimai-siyasi və humanitar məsələlər üzrə müavini Kəmalə İbrahimova, Göygöl Gənclər Evinin direktoru Şəhriyar İsmayılzadə, təhsil işçiləri, QHT nümayəndələri və fəal gənclər iştirak edib.

İlk öncə Ulu Öndər Heydər Əliyevin və torpaqlarımızın azadlığı uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

Tədbiri giriş nitqi ilə açan Yeni Azərbaycan Partiyası Göygöl rayon təşkilatının sədri Vüqar İsayev gündəlik məsələni iştirakçıların diqqətinə çatdırıb, Ulu Öndər Heydər Əliyevin Azərbaycan təhsilinin inkişafı sahəsindəki misilsiz fəaliyyətindən danışıb. Vüqar İsayev qeyd edib ki, Ulu öndər Heydər Əliyevin Azərbaycan xalqının gələcəyinə istiqamətlənmiş strategiyasında təhsil sahəsinin inkişaf etdirilməsi prioritet istiqamətlərdən biri olub. “Təhsil sahəsi həyatımızın ən gərəkli, ən mühüm sahəsidir. O, milli məqsədlər, mənafelər əsasında qurulmalıdır”, - deyən dahi rəhbər təhsil siyasətinə dövlətçiliyin təməl prinsiplərindən biri kimi yanaşıb. Ulu öndər Heydər Əliyevin Azərbaycana rəhbərliyinin birinci dövründə qəbul edilmiş qərarların icrası nəticəsində respublikada orta məktəb şəbəkəsi genişləndirildi, məktəblərin dərsliklərlə təminatı problemi həll edildi və 1978-ci ildən etibarən şagirdlərə dərsliklərin pulsuz verilməsinə başlanıldı. 1979-cu ildə ümumtəhsil məktəblərinin sayı 1965-ci ilə nisbətən üç dəfədən çox artaraq 2117-yə, 1982-ci ildə isə 4267-yə çatdı. 1970-1980-ci illərdə respublikada 683,1 min şagird yerlik 1191 yeni məktəb binası tikilib istifadəyə verildi. Ümummilli lider Heydər Əliyevin Azərbaycanına rəhbərlik etdiyi 1969-1982-ci illərdə beş yeni ali təhsil müəssisəsi açıldı. 1970-ci ildən başlayaraq hər il gənclər SSRİ-nin nüfuzlu ali məktəblərində təhsil almağa göndərilirdi. 1970-1980-ci illərdə SSRİ-nin 50-dən artıq böyük şəhərinin 170-dən çox nüfuzlu ali məktəbində 250-dən çox ixtisas üzrə 15 mindən artıq azərbaycanlı gəncin ali təhsil almasına şərait yaradıldı. Bu isə respublikanın milli kadr potensialının daha da gücləndirilməsində mühüm rol oynadı.

Dahi rəhbərin təşəbbüsünün və uzaqgörənliyinin nəticəsi olaraq 1971-ci ildə Cəmşid Naxçıvanski adına hərbi təmayüllü məktəb yaradıldı. Bu vacib missiya bu gün də davam edir, Prezident İlham Əliyevin ölkəyə rəhbərlik etdiyi bütün dövrdə və bu gün də ölkə təhsilinin inkişafına xüsusi diqqət və qayğı göstərilir.

Göygöl Rayon İcra Hakimiyyəti başçısının İctimai-siyasi və humanitar məsələlər üzrə müavini Kəmalə İbrahimova çıxış edərək qeyd etdi ki, “Təhsil millətin gələcəyidir”, - deyən Ulu Öndər Azərbaycana rəhbərliyinin ikinci dövründə (1993-2003) bu sahənin inkişafına xüsusi diqqət yetirirdi. Təhsil sisteminin maddi-texniki bazası yaxşılaşdırıldı, 200 yeni məktəb binası tikilərək istifadəyə verildi. “Azərbaycan Respublikasının təhsil sisteminin təkmilləşdirilməsi haqqında” 2000-ci il 13 iyun, “Dövlət dilinin tətbiqi işinin təkmilləşdirilməsi haqqında” 2001-ci il 18 iyun, “Azərbaycan Əlifbası və Azərbaycan Dili Gününün təsis edilməsi haqqında” 2001-ci il 9 avqust, “Azərbaycan Respublikasında dövlət dili haqqında” Qanunun tətbiq edilməsi barədə” 2003-cü il 2 yanvar tarixli fərmanlar təhsilimizin dünya standartları səviyyəsinə qaldırılmasında böyük rol oynayıb.

Sonra Göygöl Gənclər Evinin əməkdaşı Xanım Hümbətova “Azərbaycan təhsilinin inkişafında Heydər Əliyevin rolu” mövzusunda məruzə ilə çıxış etdi.

Göygöl Gənclər Evinin direktoru Şəhriyar İsmayılzadə, təhsil işçilərindən və YAP fəallarından, Salman Balakişiyev, Yeganə İsgəndərova, Zəhra Zeynalova, Məcid Məmmədov, İlkin Məmmədov çıxış edərək təhsilin inkişafı ilə bağlı görülən işlərdən və əldə olunan nailiyyətlərdən danışmış, dövlət təhsil siyasətinin uğurla həyata keçirildiyini bildirmişlər.

Bütün çıxış və nitqlərdə təhsilə göstərilən yüksək dövlət qayğısı xüsusi olaraq vurğulanmış, təhsilin inkişafına göstərdiyi diqqət və qayğıya görə əbədiyaşar Ulu Öndər Heydər Əliyevə və Respublika Prezidenti, Yeni Azərbaycan Partiyasının sədri cənab İlham Əliyevə yüksək minnətdarlıq ifadə olunub.