Göygöl rayonunda “5 oktyabr – Beynəlxalq Müəllimlər Günü” münasibəti ilə ümumrayon tədbiri keçirilib
05 oktyabr 2024 | 12:15
Göygöl Rayon İcra Hakimiyyəti və Gəncə-Daşkəsən Regional Təhsil İdarəsinin Göygöl rayonu üzrə Təhsil sektorunun birgə təşkilatçılığı ilə “5 oktyabr – Beynəlxalq Müəllimlər Günü”nə həsr olunmuş ümumrayon tədbiri keçirilib. Tədbirdə Göygöl Rayon İcra Hakimiyyətinin başçısı Elvin Paşayev, Gəncə-Daşkəsən Regional Təhsil İdarəsinin müdiri Anar Qədiməliyev, Gəncə-Daşkəsən Regional Təhsil İdarəsinin Göygöl rayon üzrə Təhsil sektorunun əməkdaşları, rayonun ümumtəhsil məktəblərinin, uşaq bağçalarının və məktəbdənkənar müəssisələrin rəhbərləri və müəllimlər iştirak ediblər. Tədbir iştirakçıları əvvəlcə Ümummilli Lider Heydər Əliyevin abidəsini ziyarət edib, abidə önünə gül dəstələri düzərək Ulu Öndərin əziz xatirəsinə ehtiramlarını bildiriblər.
Göygöl Rayon İcra Hakimiyyətinin akt zalında keçirilən tədbir Azərbaycan Respublikasının Dövlət Himninin səsləndirilməsi ilə açıq elan olunub, sonra Azərbaycan xalqının Ümummilli Lideri Heydər Əliyevin və qəhrəman şəhidlərimizin əziz xatirəsi bir dəqiqəlik sükutla yad edilib.
Tədbirdə İcra Hakimiyyətinin başçısı Elvin Paşayev çıxış edərək, ölkədə təhsilin inkişafına göstərilən dövlət dəstəyindən, Ulu Öndər Heydər Əliyevin hər zaman müəllimə yüksək qiymət verdiyindən, Prezident cənab İlham Əliyevin təhsil sahəsində həyata keçirdiyi uğurlu islahatlardan və bu islahatların Azərbaycan təhsilinə qazandırdığı uğurlardan geniş və ətraflı məlumat verib.
Tədbirdə çıxış edən digər natiqlər də “5 oktyabr – Beynəlxalq Müəllimlər Günü” münasibəti ilə müəllimləri təbrik edərək, onlara xoş arzularını çatdırıblar.
Sonda təhsildə səmərəli fəaliyyət göstərən bir qrup müəllimə Fəxri Fərman, “Uğurlu məktəb” adını qazanmış məktəb rəhbərlərinə Təşəkkürnamə, Müəllimlərin İşə Qəbulu və Sertifikasiya imtahanlarından yüksək bal toplamış müəllimlərə isə xatirə hədiyyələri təqdim olunub.
Keçidlər
