Bu gün 44 günlük Vətən müharibəsi şəhidi Sabir Yusubovun xatirəsinə inşa olunan ehsan bulağının açılış mərasimi keçirilib
06 oktyabr 2022 | 15:43
Torpaqlarımızın bütövlüyü uğrunda gedən döyüşlərdə qəhrəmancasına şəhid olan Göygöl rayon şəhidi Yusubov Sabir Firdovsi oğlunun xatirəsinə Göygöl rayonu Topalhəsənli kəndində inşa olunan ehsan bulağının açılışına həsr olunmuş tədbir keçirilib. Tədbirdən əvvəl ziyarətçilər şəhidin Göygöl rayonunun Topalhəsənli kənd qəbristanlığındakı məzarını ziyarət edərək ruhuna dualar oxuyub əziz xatirəsini anıblar.
Tədbirdə şəhidin ailə üzvləri, Göygöl Rayon İcra Hakimiyyətinin başçısısının müavini, İctimai-siyasi və humanitar məsələlər şöbəsinin müdiri Kəmalə İbrahimova, Göygöl Rayon İcra Hakimiyyəti başçısı Aparatının Vətən Müharibəsi iştirakçıları və şəhid ailələri ilə işin təşkili şöbəsinin müdiri Sərdar Balayev, Topalhəsli kənd tam orta məktəbin kollektivi, şəhidin yaxınları, ictimaiyyət nümayəndələri və kənd əhalisi iştirak ediblər.
Tədbirdə çıxış edənlər şəhid Sabir Yusubovun keçdiyi döyüş yolundan, vətənə sədaqətindən, vətən uğrunda göstərdiyi şücaətdən danışıblar. Eyni zamanda bildirilib ki, Ali Baş Komandan cənab İlham Əliyevin rəhbərliyi ilə müzəffər ordumuzun qüdrəti sayəsində torpaqlarımız düşmən tapdağından azad edilmiş, üçrəngli bayrağımız respublikamızın bütün guşələrində olduğu kimi işğaldan azad edilmiş torpaqlarımızda da əzəmətlə dalğalanır.
Xatırladırıq ki, şəhid Yusubov Sabir Firdovsi oğlu 6 oktyabr 1990-cı ildə Göygöl rayonunun Topalhəsənli kəndində anadan olmuşdur. 1998-ci ildə Göygöl rayon Topalhəsənli kənd tam orta məktəbinin 1-ci sinfinə qəbul edilmişdir. 2009-cu ildə həmin məktəbin 11-ci sinfini bitirmişdir. 2009-cu ilin oktyabr ayından 2011-ci ilin aprel ayınadək “N” saylı hərbi hissədə həqiqi hərbi xidmət keçmişdir. 27 sentyabr 2020-ci ildə 44 günlük Vətən müharibəsi başlayan zaman hərbi döyüşlərdə iştirak etmişdir. Sabir Yusubov 13 oktyabr 2020-ci il tarixdə Füzuli rayonu istiqamətində gedən döyüşlərdə şəhid olmuşdur. Ölkə Prezidentinin Sərəncamı ilə ölümündən sonra “Vətən uğrunda”, “Döyüşdə fərqlənməyə görə” və ”Füzulinin azad olunmasına görə” medalı ilə təltif edilib. Ailəli idi, 2 övladı var.
Şəhidin atası Firdovsi Yusubov ölkə Prezidenti, Müzəffər Ali Baş Komandan cənab İlham Əliyevə və birinci xanım Mehriban Əliyevaya şəhid ailələrinə dövlət səviyyəsində göstərilən diqqət və qayğıya görə öz minnətdarlığını bildirib.
Daha sonra şəhidin təhsil aldığı Göygöl rayon Topalhəsənli kənd tam orta məktəbin şagirdləri şəhidə həsr olunmuş bədii kompozisiya ilə çıxış ediblər.
Sonda isə Göygöl Rayon İcra Hakimiyyətinin başçısısının müavini Kəmalə İbrahimova və şəhidin ailə üzvləri şəhid Sabir Yusubovun xatirəsinə inşa olunan ehsan bulağının açılışını həyata keçiriblər.
Keçidlər
